Lilaj pas prezantimit te Prishtina: Nuk e njoh kampionatin kosovar, isha vetëm dy herë me Kombëtaren e Shqipërisë

Futbollisti i ri i FC Prishtinës, Sabien Lilaj, ka treguar arsyet e nënshkrimit me skuadrën nga kryeqyteti i Kosovës. Gjithashtu, ai ka thënë se nuk e njeh mirë kampionatin kosovar në futboll, por që projekti serioz i "bardhë e kaltërve", e bindi për nënshkrim të kontratës. “Për arsye familjare vendosa të lë Izraelin e të kthehem në Shqipëri. Kisha edhe një vit kontratë, meqenëse jam edhe me fëmijë të vogël, mendova se për familjen time ishte koha e duhur të kthehesha në shtëpi. Kisha rënë dakord me një ekip në Shqipëri, por për disa arsye u vonua finalizimi. Dhe erdhi oferta nga Prishtina", ka thënë ai për faqen zyrtare të klubit, transmeton Klan Kosova. "Nuk kam shumë informata për futbollin e Kosovës. Dy herë kam qenë me Kombëtaren e Shqipërisë në Prishtinë, di që edhe si qytet edhe si kampionat po zhvillohet shumë". "Projekti i Prishtinës m’u duk serioz, janë optimist. Kështu që, përse jo. Një aventurë e re dhe një objektiv i ri. Synimet janë titulli dhe sa më larg në Evropë. Të bëjmë maksimumin që të arrijmë objektivat". "Këtu njoh kryetrajnerin Dallku dhe trajnerin Curri nga Kombëtarja dhe shumë njerëz tjerë nga Kosova, veçmas nga periudha Skënderbeu. Pak a shumë ndjehem si në shtëpi, pavarësisht se ka shumë gjëra për të njohur". "Gjithmonë kontratat i kam pasur afatgjate, te Skënderbeu kam qëndruar gjashtë vite dhe kam fituar pesë kampionate. Shpresoj të mos e ndërroj edhe Prishtinën deri në fund të karrierës dhe të fitojë edhe te Prishtina ashtu siç kam fituar përpara".

klankosova.tv