Anësori i Manchester United tani ka disa mundësi për hapin tjetër në karrierën e tij.
Sipas gazetarit dhe personit të njohur Ekrem Konur, i cili e ndau lajmin në faqen e tij në rrjetet sociale X, skuadra gjermane Leipzig ka kontaktuar përfaqësuesit e sulmuesit 26-vjeçar të Manchester United, Jadon Sancho, për të diskutuar transferimin e mundshëm gjatë afatit kalimtar të verës.
Raportohet se, pavarësisht se vetë Sancho e kishte bërë të qartë më parë se dëshiron të kthehet te Borussia Dortmund, Leipzig është i bindur se mund t’i ofrojë Jadonit kushte shumë më tërheqëse, si dhe t’i garantojë kohën e lojës që ai dëshiron – diçka që mund të bëhet problem për të te Borussia.
Jadon Sancho u bashkua me Manchester United nga Borussia Dortmund në vitin 2021 për 85 milionë euro, por periudha e tij në Manchester nuk ka shkuar sipas planit. Ai ka bërë vetëm 83 paraqitje për Djajtë e Kuq, duke shënuar 12 gola dhe duke dhënë 6 asiste.
Këtë sezon, Sancho luan për Aston Villan në formë huazimi, një marrëveshje që skadon këtë verë. Ai është paraqitur në 29 ndeshje për Villan, duke shënuar 1 gol dhe duke dhënë 1 asist. /Klankosova.tv
●●●
VZSHKRIMI NGA
Vanesa Zhugolli
Editorial nga Klan Kosova — ndjek sport dhe zhvillimet e tjera kryesore të vendit.
