Largohen tre pjesëtarë të stafit mjekësor te Kombëtarja e Kosovës

Pas dy dekadave, tre pjesëtarë të stafit mjekësor të Kombëtares së Kosovës në futboll janë larguar. Lajmin për largimin e Murat Berishës, Zheralldin Durgutit dhe Ismet Shalajt e ka bërë të ditur Drejtori Sportiv në Art Motion, Arlind Sadiku. Treshja nuk e ka bërë të ditur arsyen e këtij largimi, por se i kanë dëshiruar suksese kombëtares dhe sa më pak lëndime. “Jemi krenarë që ishim staf mjekësor në Përfaqësuesen e Kosovës në Futboll. Falënderim i veçantë për lojtarët e Përfaqësues së Kosovës, që nga viti 2006-2023. Djema, ju e keni bërë krenare Kosovën. Ju urojmë shëndet, sa më pak lëndime dhe suksese në të ardhmen”, citon Sadiku postimin e mjekut Murat Berisha. Këto largime vijnë vetëm pak ditë para ndeshjeve të Kosovës ndaj Zvicrës dhe Rumanisë, që do të zhvillohen me 9, respektivisht 12 shtator.