Laporta: Yamal ka rënë dakord të rinovojë kontratën e tij, veç po presim të mbushë 18 vjeç

Presidenti i Barcelonës, Joan Laporta ka konfirmuar se gjithçka është në rrugën e duhur që Lamine Yamal të nënshkruajë kontratën e tij të re këtë korrik, pasi ai të mbushë 18 vjeç. Duke folur në një intervistë për TV3 (Mundo Deportivo), Laporta shprehu besimin e plotë se rinovimi do të shkojë pa probleme, duke e quajtur anësorin e ri “të jashtëzakonshëm” dhe duke këmbëngulur se Yamal është i lumtur në klub, transmeton Klankosova.tv. "Ne jemi duke punuar për këtë nënshkrim. Do të shkojë mirë. Ai është një lojtar i veçantë dhe ndihet si në shtëpinë e tij në Barça", tha Laporta, i cili e bëri të qartë se klubi po e trajton situatën me shumë kujdes dhe durim. Laporta theksoi se një lojtar si Yamal, i cili ka pasur një rritje kaq të shpejtë, meriton një lloj mbështetjeje dhe njohjeje unike nga klubi. "Taksa e transferimit duhet të përputhet me vlerën e lojtarit me ekipin, pavarësisht se sa i ri është ai. Një talent si Lamine, i cili ka shpërthyer në mënyrën si ka, duhet të trajtohet në një mënyrë të veçantë", tha Laporta.