Lajme "të këqija" për kampionin e Kosovës në basketboll

Trajneri me të cilin Golden Eagle Ylli fitoi 4 trofe për dy vjet, Adis Beciargiq, mbrëmë pas fitores ndaj Prishtinës, u pa i pranishëm edhe në një aheng të organizuar për të arriturat gjatë vitit 2022 nga sponsori kryesor i klubit, Golden Eagle, dhe më pas herët në mëngjes është nisur për në Turqi. Ky udhëtim në Stamboll fillimisht është thënë se ndodhi për festat e fundvitit, meqenëse Aziz Bekir, siç quhet boshnjaku në Turqi, atje e ka familjen e ngusht. Megjithatë mediat turke po e lidhin një kalim të mundshëm të tij me skuadrën e Konyaspor, tek e cila Beciargiq ka qenë edhe më parë. Sipas gazetarit turk Fatih Şeker, takimi i parë mes dy palëve, ka rezultuar i suksesshëm, kurse në ditët vijuese pritet definimi. Trajneri që aktualisht, pos Yllit, udhëheq edhe Kombëtaren e Bosnje e Hercegovinës, do ta përcjell nga afër ballafaqimin e kampional mes Konyas dhe Galatasaray që zhvillohet këtë të shtunë, më 31 dhjetor. Nga skuadra kampione e Kosovës, nuk e kanë konfirmuar një gjë të tillë, meqenëse boshnjaku që ka edhe nënshtetësi turke, ka kontratë me Yllin deri në fund të sezonit. Kujtojmë që me Adis Beciragiq, skuadra nga Suhareka ka fituar 2 tituj të Kampionit të Kosovës, njërin pas tjetrit, kurse triumfoi edhe në edicionin e parë të Ligës Unike, si dhe Superkupës Mbarëkombëtare. Para kësaj kohe, Beciragiq udhëhoqi edhe Pejën drejt triumfit në Kupën e Kosovës.