Diplomati sllovak dhe ish-përfaqësuesi special i Bashkimit Evropian për dialogun Kosovë-Serbi, Miroslav Lajçak do të bëhet këshilltar i kryeministrit sllovak, Robert Fico, për çështjet që kanë të bëjnë me Ballkanin Perëndimor, tha Presidenti Peter Pellegrini në një konferencë për shtyp gjatë vizitës së tij zyrtare në Shqipëri të premten.
Për këtë, Pellegrini ka njoftuar presidentin shqiptar Bajram Begaj gjatë bisedimeve të së premtes në Tiranë. “E informova presidentin se ish-Përfaqësuesi i Lartë i BE-së për dialogun Kosovë-Serbi, Miroslav Lajçak, është bërë këshilltar i kryeministrit për çështjet e sigurisë në rajon”, tha Pellegrini, duke shtuar se qeveria shqiptare ka një person të afërt me qeverinë sllovake për dialog, raporton agjencia sllovake e lajmeve TASR.
Lajçak ka mbajtur pozita të ndryshme diplomatike, duke përfaqësuar jo vetëm Sllovakinë, por edhe Kombet e Bashkuara dhe Bashkimin Evropian. Së fundmi (prill 2020-janar 2025), ai shërbeu si i dërguari special i Bashkimit Evropian për Dialogun Kosovë-Serbi.
Në të kaluarën, ai ka shërbyer gjithashtu si ambasador në Rusi, Japoni dhe vendet e Ballkanit Perëndimor. Ai ka shërbyer si ministër i punëve të jashtme të Sllovakisë disa herë dhe kryesoi Asamblenë e Përgjithshme të 72-të të Kombeve të Bashkuara. /Klankosova.tv
●●●
ASHKRIMI NGA
A
Editorial nga Klan Kosova — ndjek lajme dhe zhvillimet e tjera kryesore të vendit.
