Kryeministri i Kosovës, Albin Kurti, ka takuar dje Imer Sefë Mleqanin (Baca Imer) – bartësin klasik të folklorit.
Përmes një postimi në Instagram, shefi i qeverise bëri të ditur se bashkë me ministrin e Kulturës, Hajrulla Çekun, deputetin Enver Dugolli, dhe Kryetarin e Këshillit të Ansamblit Kombëtar të Këngëve dhe Valleve “Shota”, Visar Munishin, kaluan kohë me bacën Imer.
Kurti tregoi përmes postimit se me bacën Imeri bisedoi për çiftelinë dhe për mishërimin e tij me atdheun e me traditën muzikore, njofton Klankosova.tv.
Lexoni më poshtë postimin e plotë:
Baca Imer, besniku i fortë i këngës sonë! Sot patëm kënaqësinë ta takojmë së bashku me ministrin e Kulturës, Rinisë dhe Sportit, Hajrulla Çeku, deputetin Enver Dugolli, dhe Kryetarin e Këshillit të Ansamblit Kombëtar të Këngëve dhe Valleve “Shota”, Visar Munishi. Baca Imer është bartësi klasik i folklorit tonë, është modeli sublim që studiuesit botëror do e kërkonin si subjekt - e ne jemi me fat që e kemi atë dhe të tjerët si ai.
Biseduam për çiftelinë, se si e kishte mësuar ta luante dhe si ishte pasuar tradita nga gjyshi Ibrahimi tek babai Sefa, djemtë e tij e si vazhdon dhe sot te nipat. Diskutuam për veçantinë e këtij instrumenti, se si është zhvilluar ndër shekuj në trojet shqiptare, si pranohet botërisht si instrument i yni, e për variacionet e tij që i gjejmë nëpër botë.
Biseduam edhe për mishërimin e tij me atdheun e me traditën muzikore, të bartur shpirtërisht e artistikisht nga babai i tij, i papërsëritshmi, Sefë Mleqani. Folëm gjatë e prajshëm për shumë gjëra, për vëllezërit, Osmanin, Ibrahimin e Ismetin, vëllaun martir Xhaferin, vëllaun dëshmor Beqirin, i rënë për liri bashkë me komandant Mujë Krasniqin.
I gjithë ky zell njerëzor i shkrirë edhe në formacionin ikonë të folklorit “Bijtë e Sefë Mleqanit”.
Folklori ynë, ashtu si te baca Imer dhe familja e tij, mbetet i gjallë dhe formëson shpirtin artistik të shoqërisë sonë.
Imer Sefë Mleqani (Gashi) me 80 vjetët e tij sot e ka bagazhin e mjaftueshëm për mburrje për krijimtarinë e tij, krenari të cilën e kemi ne falë punës së tij të palodhshm. Ai i kishte frymëzim paraardhësit e tij, e u bë i tillë për brezat pas tij.
●●●
VRSHKRIMI NGA
Ve Ra
Editorial nga Klan Kosova — ndjek kulturë dhe zhvillimet e tjera kryesore të vendit.
