“Kujtime nga Lumi” nga Zana Hoxha, premierë në Prishtinë

Premiera e shfaqjes teatrale “Kujtime nga Lumi”, me regji dhe dramaturgji nga Zana Hoxha, do të jepet më 27 korrik në Prishtinë. Kjo vepër sjell një rrëfim personal, përmes kujtimeve të një miqësie të fëmijërisë që sfidon normat tradicionale dhe stigmat shoqërore. Në brigjet e një lumi që dikur ishte vend loje, ëndrrash dhe sekretesh, sot mblidhen kujtime, trauma dhe pyetje që s’kanë marrë përgjigje. Kujtime nga Lumi sjell një udhëtim të brendshëm përmes jetëve të dy të rinjve, Hana dhe Mance, të cilët përballen me peshën e pritshmërive shoqërore, krizën e identitetit dhe betejat e padukshme të shëndetit mendor. Përmes monologëve të thellë dhe dialogëve të brishtë, të ndërthurur me kujtime fëmijërie, tinguj lumi dhe heshtje që flasin më shumë se fjalët, shfaqja eksploron miqësinë platonike, dashurinë e parealizuar, ndjenjën e izolimit dhe etjen për kuptim. Kjo shfaqje nuk jep përgjigje, por fton publikun të dëgjojë – jo vetëm zërat e personazheve, por edhe zërat brenda vetes. Në një kohë ku të rinjtë luftojnë në heshtje, kjo shfaqje është një thirrje për dhembshuri, guxim dhe dëgjim të vërtetë. Narrativa ndërthuret përmes interpretimeve të katër aktorëve, me Qendresa Kajtazin dhe Edon Shilekun në rolet kryesore, duke krijuar një dialog të fortë mes së kaluarës dhe së tashmes. Shfaqja gjithashtu shoqërohet me një diskutim të hapur të udhëhequr nga regjisorja, ku publiku ftohet të ndajë reflektime dhe përjetime. Shfaqja zhvillohet në një format eksperimental dhe interaktiv, ku publiku nuk është vetëm spektator, por pjesë aktive e përvojës. “Kujtime nga Lumi”, fillon në ora 20:30 te Fontana e Pallatit te Rinise dhe vazhdon në Burgun e Idealit, ndërsa repriza jepet me 28 korrik. /Klankosova.tv