“Kthimi në Kosovë”, filmi që do të diskutohet sonte – një histori lufte, mbijetese dhe ribashkimi

Historia e fuqishme e Besnikut dhe Julius, paraqitet në filmin “Kthimi në Kosovë”, e cila ndjek rrugëtimin e gazetarit britanik Julius Strauss dhe Besnik Deliut, një pesëvjeçar që i mbijetoi një masakre brutale gjatë luftës në Kosovë. Më shumë se dy dekada pas takimit të tyre të parë, Julius dhe Besniku ribashkohen për të zbuluar të vërtetën e plotë të asaj dite tragjike. Nga Kosova e shkatërruar prej luftës deri në egërsinë kanadeze, ky film prekës eksploron humbjen, qëndrueshmërinë dhe ndikimin e përhershëm të luftës. Lidhur me këtë tregim të fuqishëm të mbijetesës dhe pajtimit, sonte në orën 18:00, tek Shtëpia e Gazetarëve/Reporting House, pas shfaqjes së filmit, do të ketë diskutim mbi pasojat e luftës dhe fuqinë e lidhjes njerëzore. Julius Strauss, Leman Kamberi dhe Vaughan Smith, të cilët morën pjesë në realizimin e këtij dokumentari, do të jenë të hapur për një sesion pyetjesh dhe përgjigjesh pas shfaqjes së filmit.