Dardan Krasniqi, kandidati i Aleancës për deputet në zgjedhjet e qershorit, në Edicionin Special në Klan Kosova, ka hedhur kritika të ashpra ndaj kryeministrit në detyrë, Albin Kurti.
Krasniqi tha se beson që Kurti ka ardhur në pushtet për të shkatërruar çdo arritje që është bërë për shekuj me radhë ndër shqiptarë.
“Ky njeri, nuk po shoh që ka ardhur me agjendën për ta ndërtuar as zhvillimin ekonomik, as për progres në arsim, në kulturë, as për ta ndërtuar demokracinë që ka qenë shumë e lënduar, as për të ndërtuar institucionet të cilat i ka kapur me nepozitëm, ka sfiduar sundimin e ligjit. Dhe kushdo që do me e parë, ky ka ardhur me e shkatërruar secilën arritje të shqiptarëve që e kanë bërë ndër shekuj deri këtu. Domethënë, kjo shihet”, tha Krasniqi.
Këtë deklaratë, ai e bazon në disa pika që sipas tij kontribuojnë në bindjen e tij për këto që i deklaroi.
“Duke e parë edhe atë se si tallet edhe me Shtetet e Bashkuara të Amerikës, se si tallet me secilin që e do vendin e vet më mirë, do me e parë më mirë, se si e keqtrajton secilin mendim ndryshe, unë jam shumë i sigurt që vetëm kjo nuk është një diçka që ka ardhur prej atyre të cilët i duan shqiptarët. Pra, diskursi i tij politik për mua është për dhimbje”, u shpreh kandidati i Aleancës për deputet.
Ndër të tjera, Krasniqi tha se pushteti i LVV-së ka polarizuar shqiptarët gjithandej ku jetojnë.
“Ajo çfarë ka me mbajtur ky pushtet, kur të kalojë kjo çoroditja e madhe e kësaj fryme kontaminuese, është se veç polarizimi i madh që ka shkaktuar në shoqëri – jo vetëm në Kosovë, por gjithandej ka shqiptarë”, tha Dardan Krasniqi. /Klankosova.tv
