Kosova merr dy medalje nga Grand Sllemi i Kazakistanit

Ka përfunduar gara Grand Sllem në Kazakistan, aty ku morën pjesë 42 shtete e mbi 330 atletë nga mbarë bota. Kosova u përfaqësua me katër garues, Akil Gjakova, Nora Gjakova, Loriana Kuka dhe Laura Fazliu. Nga kjo garë, Kosova mori dy medalje dhe një vend të shtatë. Nora Gjakova doli nënkampione e kategorisë 57kg, duke fituar medaljen e argjendtë. Për Norën, kjo ishte medalja e shtatë në karrierë nga garat Grand Sllem, dy të arta tri të argjendta dhe dy të bronzta. Laura Fazliu fitoi të bronztën në kategorinë 63kg, ishte e treta medalje në këtë nivel, një të argjendtë dhe dy të bronzta. Akil Gjakova doli i shtati, ndërsa deri tash në këso gara në xhudo ka një të artë dhe një të argjendtë. Loriana Kuka raundin e parë e kaloi pa luftë në Kazakistan, kurse pësoi në luftën e parë në raundin e dytë. Kuka ka tri medalje të bronzta në garat Grand Sllem aktualisht. Të gjitha përballjet për medalje nga Grand Sllemi i Kazakistanit, janë transmetuar direkt në kanalet e sportit në Artmotin nga data 16 – 18 qershor, pra të premten, shtunën dhe të dielën.