Kosova debuton në Lojërat Paralimpike “Paris 2024”

Komiteti Paralimpik i Kosovës përmes një komunikate për media ka njoftuar se Kosova ka shënuar sot njërin ndër momentet më të rëndësishme në historinë e sportit të saj. Në mesin e mbi 50 mijë shikuesve nga mbarë bota, për herë të parë, flamuri i Kosovës ka valuar në ceremoninë hapëse të Lojërave Paralimpike “Paris 2024”. Në komunikatë bëhet e ditur se ceremonia hapëse u zhvillua në sheshin Place de la Concorde dhe Champs-Elysees në Paris, me fillim nga ora 20:00, ku defiluan gjithsej 166 shtete nga mbarë bota. Ky moment njëherësh shënon edhe debutimin e Kosovës në lojërat më prestigjioze të para sportit botëror, siç thuhet aty, synim i kahershëm i parasportit kosovar. “Në këtë ngjarje madhështore të parasportit, vendi ynë përfaqësohet nga  paraatleti Grevist Bytyqi, i cili do të garojë në sportin e atletikës, në kategorinë T46, në disiplinën 1500 metra. Në këtë rrugëtim sfidues, Grevisti është i shoqëruar nga presidentja e Komitetit Paralimpik të Kosovës, Njomza Emini, trajneri Adrian Mazreku dhe shefja e misionit, Arjeta Gashi”. “Pjesëmarrja e Kosovës në këto lojëra u mundësua falë anëtarësimit të vendit tonë në Komitetin Paralimpik Ndërkombëtar vitin e kaluar, moment që i hapi rrugën përfshirjes së parasportistëve tanë në këtë ngjarje madhore, e cila simbolizon përfshirjen, barazinë dhe fuqinë e sportit për të kaluar çdo pengesë”. “Në lojërat e sivjetme botërore të parasportit, të cilat zgjasin 11 ditë, do të marrin pjesë 4,400 paraatletë në gjithsej 22 parasporte”, thuhet tutje në komunikatën për media.