Kori i Filharmonisë së Kosovës përmbyll prezantimin në Itali

Kori i Filharmonisë së Kosovës ka përmbyllur prezantimin në Itali me koncertin e organizuar në Sallën Akademike "Santa Cecilia" në Romë. Nën drejtimin e Rafet Rudit, koncerti është hapur me "Sancta Maria" nga Giorgio Lapazaya dhe "Psalt" nga Jan Kukuzeli, dy vepra që paraqesin një vlerë të jashtëzakinshme të thesarit historik të muzikës shqiptare, njofton ministria e Kulturës, përcjell Klankosova.tv. Tutje u interpretuan veprat "Stars" e Eriks Esenvalds, "OEIA" nga Mendi Mengjiqi, "Biegga Luohte" nga Jan Sandström me solistë Etrit Nura (tenor) e Harris Bajraktari (bas) dhe "Janinës ç'i panë sytë'" me solistë Kaltrina Miftarin (soprano) e Luan Durmishin (tenor). "Lamento della Ninfa (Amor)" i Claudio Monteverdit, u mirëprit nga publiku roman në interpretim të sopranos Kaltrina Miftari - soprano e shoqëruar nga Shaban Behramaj - bas, Arlind Gjyshinca - bariton dhe Rizah Jahaj - tenor me pjesëmarrjen e organistit italian Daniel Sanmartín-Nieto. Në bllokun e fundit u interpretuan "The Joy in Loving" nga Aulon Naçi, "Nyon, nyon" nga Jake Runestad dhe "Pakëz në ëndërr, pakëz në zhgëndërr" nga Baki Jashari me narrator Shaban Behramajn. Koncerti arriti në kulmin e tij me "Concerto Fantasy" për violinë dhe kor nga Rafet Rudi, në interpretim të Korit dhe violinistes virtuoze Sihana Badivuku.