Koalicione jo parimore-programore, prurje të reja kualitative, rritje kumulative e votave

Në sfond të parapërgatitjeve për organizimin e zgjedhjeve, Ambasadori i Britanisë së Madhe në Prishtinë, Sh.T. Jonathan Hargreaves, deklaron se moslejimi i pjesëmarrjes në zgjedhje të një subjekti politik është rrezikim i reputacionit të vështirë të fituar të demokracisë multietnike. Është ky një demarshim publik drejtuar institucioneve dhe spektrit politik të Kosovës. Në momentin e fundit u pa se cilat janë koalicionet parazgjedhore. Tek boshti i majtë, i udhëhequr nga Lëvizja Vetëvendosje, janë rreshtuar parti minore të qendrës së djathtë apo të djathta: Alternativa, Guxo dhe së fundmi Partia Demokristiane e Kosovës. Shikuar nga aspekti ideologjik, këtu bëhet fjalë për koalicione jo parimore, pra kemi të bëjmë me akomodim elektoral jo-programor. Cilat mund të jenë prurjet aritmetike të votave të tri partive minore në kumulativin e votave në taborin e VV-së? Në anën tjetër, partitë e tjera kanë vendosur që të mos formojnë front me një kauzë të vetme politike. Ajo që i karakterizon partitë PDK, LDK dhe AAK janë aderimet e profesionistëve, rikthimet e figurave politike që për një kohë ishin tërhequr nga jeta publike/politike. LDK ka rikthyer të birin e Presidentit Historik Ibrahim Rugova, Ukë Rugovën, ambasadorë, ushtarakë, profesionistë të lëmive, nga të cilët pritet të ofrojnë kontribut profesional dhe gamë votash me rëndësi për rritjen e numrit të deputetëve në Kuvendin e Kosovës. PDK, tashmë e udhëhequr nga lideri i saj i ri, Bedri Hamza, po ashtu është hapur për prurje të reja. Multiplikimi i votave për këtë parti, përpos figurave të periudhës së artë, do të vinte me rikthimin e Fatmir Limajt dhe anëtarëve të NISMA-s, të cilët kanë votë standarde prej 20-25 mijë votash, gjë që do të konsolidonte ndjeshëm kumulativin elektoral të PDK-së. Aleanca për Ardhmërinë e Kosovës, nga prurjet e reja për këto zgjedhje, rikthen gjeneral Agim Çekun, ish-kryeministër i ditëve pak para shpalljes së Pavarësisë. AAK, me prurje të reja, me siguri se do të mund të determinojë kolazhin politik në legjislaturën e ardhshme të Kosovës. Subjektet politike të komuniteteve jo shumicë, e në veçanti përfaqësimi i komunitetit serb, janë kategori kushtetuese të demokracisë multietnike të Kosovës, për çka Kosova njihet ndërkombëtarisht, dhe që determinojnë procesin elektoral demokratik dhe formimin e çfarëdo koalicioni qeveritar. Parapërgatitjet, rirreshtimet, konsolidimi i radhëve partiake si dhe sfondi ndërkombëtar, pa dyshim se do të rezultojnë me një atmosferë të re politike.