Java e Gjuhës Italiane në Botë nis me aktivitete të shumta në Prishtinë

Duke filluar nga sot e deri më 19 tetor mbahet edicioni i 25-të i Javës së Gjuhës Italiane në Botë, organizuar nga rrjeti diplomatik-kulturor i Ministrisë së Jashtme nën Patronazhin e Lartë të Presidencës së Republikës së Italisë. Ky edicion mbahet me temën "Italofonia: gjuha përtej kufijve" me qëllim festimin e hapësirës gjuhësore, kulturore dhe sociale të italishtes. Me këtë rast, Ambasada italiane në Prishtinë dhe Instituti Italian i Kulturës në Tiranë, i cili është gjithashtu përgjegjës për Kosovën, paraqesin një program të pasur ngjarjesh, përfshirë seminare, aktivitete edukative dhe shfaqje filmash për të rritur dhe për të rinj. Java hapet sot me ngjarjen "Dita Erasmus e Italisë", një ditë e dedikuar promovimit të mundësive për të studiuar në Itali për të rinjtë kosovarë që synojnë të studiojnë jashtë vendit. Chiara Gilardoni e Uni-Italia  promovon ndërkombëtarizimin e sistemit akademik italian. Nesër, Ambasada italiane në bashkëpunim me Universitetin “Hasan Prishtina” do të organizojë seminarin mbi "Italishten në botë" në ambientet e Rektoratit, me të ftuarin e nderit profesor Leonardo Maria Savoia, anëtar i Accademia della Crusca. Së bashku me profesor Savoia-n, zëvendës rektorja për Marrëdhënie Ndërkombëtare, Rozafa Basha dhe  Majlinda Bregasi, drejtoreshë e Institutit të Gjuhës dhe Kulturës Italiane të Universitetit “Hasan Prishtina,” do të diskutojnë gjithashtu përhapjen e gjuhës italiane në botë. Të mërkurën, më 15 tetor, në kinemanë Kino Armata do të jepet shfaqja e filmit "La Vergine Giurata" nga Laura Bispuri (2015) bazuar në veprën me të njëjtin emër të Elvira Dones, një shkrimtare shqiptare që ka zgjedhur disa herë italishten si mjet shprehjeje të rrëfimit të saj. Të enjten e 16 tetorit, Ambasada Italiane do të takohet me studentët e rinj italianë të Shkollës Princeton të Prishtinës për një "Lojë Kuizi Italian" argëtuese me të cilën studentët do të testojnë njohuritë e tyre për gjuhën italiane në një lojë paralelesh me shqipen. Poashtu, një "Kafe Letrare" kushtuar Stefano Benni-t, të organizuar së bashku me shkollën e gjuhëve "Qendra Dante", dhe një takim do të mbahet në ambasadë me qëllim përkujtimin e veprave të Stefano Benni-t përmes një serie leximesh në italisht të fragmenteve nga vepra "Saltatempo", të përkthyera edhe në shqip. Gjithashtu, për të përkujtuar figurën e Benni-t, fushata sociale "Pillole di Libri" do të zhvillohet gjatë gjithë javës. Çdo ditë, fragmente të shkurtra të veprave të Benni-t do të publikohen në rrjetet sociale të Selisë Qendrore për të promovuar njohuritë e tyre edhe tek publiku kosovar./Klankosova.tv