Jasir Asani afër transferimit të Partizani

Jasir Asani dhe Partizani, një histori dashurie që mund të rinisë aty ku u ndal. Ylli i Kombëtares i Kombëtares shqiptare, i cili ka mbetur “peng” i situatës gjeopolitike në Lindjen e Mesme, por që e ardhmja e tij sportive ka filluar të shqyrtohet seriozisht dhe mundësia më konkrete dhe me emergjente për të mos humbur edhe formën dhe ritmin e kohëve të fundit, është që të veshë sërish fanellën e kuqe. Pas një eksperience në Korenë e Jugut, Asani u transferua te gjigantët iranianë të Esteghlal. Megjithatë, përshkallëzimi i konfliktit të armatosur në rajon detyroi klubin të lejonte lojtarët e huaj të largoheshin për motive sigurie. Asani u rikthye menjëherë në Shqipëri, por me një ngjyrë “gri” mbi dokumentacionin e tij: klubi iranian e ka lejuar të largohet fizikisht, por ende nuk ka dhënë dritën e gjelbër për dokumentet që do t’i lejonin transferimin zyrtar në një kampionat tjetër. Sulmuesi i Kombëtares po stërvitet nën urdhrat e stafit teknik të Partizanit në kompleksin skuadrës së Shqipërisë. Ajo që nisi si një mbajtje forme në ambientet ku u shpall kampion vite më parë, tashmë është shndërruar në një pistë konkrete merkatoje. Drejtuesit e Partizanit i kanë paraqitur lojtarit një ofertë zyrtare. Plani i “Demave” është i qartë: Asani të luajë me Partizanin të paktën deri në mbyllje të këtij sezoni. Kjo lëvizje do t’i shërbente lojtarit për të pasur minuta në këmbë dhe për të qëndruar në fokusin e Kombëtares, ndërkohë që pritet stabilizimi i situatës në Iran apo zgjidhja përfundimtare me dokumentacionin. Rikthimi i Asanit do të ishte “qershia mbi tortë” për sulmin e Partizanit në garën për titullin kampion. Për lojtarin, ky është mjedisi ideal; aty ku ai u rrit si futbollist dhe ku gëzon mbështetjen e pakursyer të tifozerisë. Tashmë topi është në fushën e Jasirit. A do ta pranojë ai sfidën për t’u rikthyer aty ku nisi shkëlqimin, apo do të presë një tjetër dritare nga jashtë? Një gjë është e sigurt: kryeqyteti është në ethe për rikthimin e mundshëm të numrit 9 të Shqipërisë./TCh