Jashari, shumë afër Milanit

U fol shumë kohëve të fundit për një transferim të mundshëm të Ardon Jasharit te AC Milani. E pas shumë mosmarrëveshjesh, duke se Milani dhe Club Brugge janë pranë përcaktimit të transferimit të Jasharit te Rossonerët. Pika e kthesës erdhi të hënën pas takimit midis lojtarit, presidentit të klubit belg, Bart Verhaeghe, dhe drejtorit ekzekutiv Bob Madou: mesfushori përsëriti se nuk do të pranonte asnjë destinacion tjetër dhe se dëshira e tij e fortë është të veshë fanellën e Rossonerëve, raporton “La Gazzetta dello Sport”, transmeton Klankosova.tv. Në fakt, Jashari kështu refuzoi ekipet e Premier League dhe Arabia Saudite, duke e detyruar Club Brugge të mbante fjalën që i ishte dhënë, domethënë ta shiste atë përballë një oferte rekord për kampionatin belg. Milani ka vënë në tavolinë 33.5 milionë plus 4.5 milionë të tjera në bonuse, nga të cilat 2 janë të lehta për t'u arritur (të lidhura me kualifikimin e ekipit të Allegrit për Ligën e Kampionëve në vitet e ardhshme). Dhe të martën ata bënë një përpjekje shtesë duke rritur pjesën fikse në 34 milionë. Kjo do të jetë shuma që do të paguajë klubi italian, nëse nuk ka kthesa të mëtejshme në orët e ardhshme. Sipas gazetës italiane të specializuar në sport, Jashari nuk do të largohet sot nga Club Brugge, duke marrë pjesë në ndeshjen e parë të raundit të tretë kualifikues të Ligës së Kampionëve kundër Salzburgut. Kjo është një tjetër nga pikat mbi të cilat mesfushori arriti një marrëveshje me menaxhmentin e tij. Prandaj, ai do të mbetet në Belgjikë dhe do të presë dritën jeshile për të marrë një fluturim direkt për në Milano. Ai mund të zbarkojë në Itali që këtë mbrëmje ose nesër për t'iu nënshtruar ekzaminimeve mjekësore dhe për të nënshkruar një kontratë pesëvjeçare me vlerë 2.5 milionë (dhe në rritje) plus bonuse. Me të, Allegri do të ketë në dispozicion një mesfushë me substancë të shquar që përfshin gjithashtu Riccin, Fofanan, Modricin dhe Loftus-Cheek, përveç Musah dhe Bondos. Të paktën njëri nga dy të fundit do të shitet. /Klankosova.tv