Jamie Shea thotë se me takimin e Berlinit, Perëndimi dëshmoi se Ballkani është sërish i rëndësishëm

Ish-zëdhënësi i NATO-s gjatë periudhës së luftës në Kosovë, Jamie Shea ka thënë se aktiviteti i BE-së në Ballkan është rritur, gjë që sipas tij mund të shihet edhe përmes takimit të 4 majit në Berlin të organizuar nga kancelari gjerman Olaf Scholz ku i priti ndaras kryeministrin e Kosovës, Albin Kurti dhe presidentin serb, Aleksandar Vuçiq. “BE-ja më në fund e ka kuptuar se kjo është një temë e rëndësishme. Politika e kaluar ishte e keqe, e vuri të gjithë përgjegjësinë për anëtarësimin në kurrizin e vendeve të rajonit, BE-ja duhej të ndihmonte më shumë dhe të ishte më aktive për të ndihmuar transformimin. Tani kemi sërish shumë aktivitete, shohim se kancelari gjerman Olaf Scholz organizoi një takim mes (Aleksandar) Vuçiqit dhe kryeministrit të Kosovës Albin Kurti. Ministrja e Jashtme gjermane Annalena Baerbock pati një turne të madh në rajon. I dërguari i SHBA-së Gabriel Escobar është gjithashtu aktiv. Perëndimi dëshmon se Ballkani është sërish i rëndësishëm për të”. Shea mes tjerash në një intervistë për portalin kroat Index thekoi se BE-ja duhet të ndihmojë ekonomikisht vendet që kanë statusin e kandidatëve për anëtarësim, transmeton Klankosova.tv. "Bashkimi Evropian duhet të zhvillojë një qasje më fleksibile dhe t'iu sigurojë vendeve kandidate disa përfitime të anëtarësimit, veçanërisht në aspektin ekonomik në mënyrë që procesi i anëtarësimit të jetë gradual, dhe në mënyrë që të ketë lëvizje drejt integrimit. Disa në Bruksel mendojnë se kjo është arsyeja pse është e nevojshme për të ndryshuar marrëveshjet themelore të BE-së, e cila nuk është kurrë e lehtë, por çështja është të kërkojmë një zgjidhje inovative”, shtoi ish-zëdhënësi i Aleancës Veri-Atlantike, transmeton Klankosova.tv.