Ish-basketbollisti Granit Rugova garon në listën e PDK-së për asamble në Prishtinë

Ish-basketbollisti i KB Prishtinës dhe Kosovës, Granit Rugova ka njoftuar se do të garojë për pozitën e asambleistit të Kuvendit Komunal të Prishtinës, si kandidat nga Partia Demokratike e Kosovës. Rugova nëpërmjet një postimi në Facebook, ka shkruar se kësaj gare po i hyn me besimin dhe bindjen e plotë se energjia dhe idetë të cilat Urani do t’i jetësojë gjatë mandatit të ardhshëm si udhëheqës i Prishtinës. "Përmes këtij postimi dua t’ju informoj se në zgjedhjet e ardhshme komunale kam vendosur të kandidoj për pozitën e asambleistit të Kuvendit Komunal të Prishtinës, si kandidat nga tabori i Partisë Demokratike të Kosovës dhe përkrahës i vizionit të Uran Ismailit për kryeqytetin. Kësaj gare po i hyj me besimin dhe bindjen e plotë se energjia dhe idetë të cilat Urani do t’i jetësojë gjatë mandatit të ardhshëm si udhëheqës i Prishtinës do të reformojnë në përgjithësi jetesën në qytetin tonë të zemrës", ka shkruar Rugova. "Këtij rrugëtimi përkrah Uranit i jam qasur me idenë e qartë se ndryshimet duhet të bëhen nga brenda dhe me përkushtimin e plotë që në mandatin e ardhshëm qeverisës të jem zë i fortë i qytetarëve dhe mbështetës i të gjitha ndryshimeve pozitive në Prishtinë, me theks të veçantë në fushën e sportit, rinisë dhe jetës së shëndetshme". Tutje Rugova ka thënë se përvojën 20 vjeçare si sportist do ta jap në promovimin e sportistëve të kryeqytetit. "Pas pothuajse 20 vite përvojë dhe karrierë si sportist profesionist dhe si administrator i sportit, gjatë të cilave kam pasur nderin dhe privilegjin që të përfaqësoj basketbollin e Prishtinës dhe Kosovës, por edhe si menaxher me edukim formal dhe profesional, jam i gatshëm që të jap kontributin tim në promovimin e sportit dhe sportistëve të kryeqytetit, që si epiqendër e të gjitha veprimtarive sportive kryesore në vend, qytet universitar dhe shtëpi e mijëra sportistëve e qindra klubeve sportive, vazhdon të mos ofrojë as kushtet elementare për jetesë të shëndetshme dhe sportistë".