INTERVISTË| Gjytari kosovar Fatlum Berisha rrëfen emocionet e "Championsit"

7 korriku 2021 do të mbahet në mend gjatë për katër gjyqtarë të futbollit nga Kosova. Genc Nuza si kryesor, Fatlum Berisha dhe Bujar Selimaj si asistentë dhe Dardan Çaka si i katërt gjykuan sfidën e rrethit të parë të Ligës së Kampionëve, Dinamo Zagreb – Valur. Ishte kjo ndeshja e parë e gjykuar nga arbitra kosovarë në një garë të tillë që prej pranimit të Kosovës në UEFA. Në duelin që përfundoi me rezultatin 3:2 për vendasit nga Kroacia, katërshja kosovare mori notë pozitive duke qenë në nivel të detyrës. Për anësorin nga Fushë Kosova, Fatlum Berisha, lajmi që iu dha për të qenë në një duel të tillë në garën më të madhe të futbollit për klube në Evropë ishte i jashtëzakonshëm. Në një intervistë për portalin Klankosova.tv, Berisha ka rrëfyer emocionet e ftesës, udhëtimin drejt Kroacisë, por edhe sfidat e duelit në fjalë. “Lajmi për pjesëmarrje në kompeticionin më të rëndësishëm në futboll ka qenë fantastik për mua. Tani unë kam bërë histori, sepse deri në këtë kohë kam gjykuar vetëm në Kampionatin Evropian U17 ku kam arritur deri në ndeshjen gjysmëfinale, por  atë ditë e kam kaluar atë nivel”.

Fatlum Berisha

Udhëtimi drejt shtetit ballkanik, por edhe ndarja e drejtësisë në një stadium si “Maksimiri” i njohur më shumë për ndeshjet e viteve të 80-ta ku Dinamo Zagreb bëri histori e ku aktualisht po bën një gjë të tillë pasi vit pas viti luan në ndeshjet e kompeticioneve siç është Liga e Kampionëve dhe Liga e Evropës, për Berishën ishte sa emocional aq edhe moment krenarie  pasi po bënte histori si personale ashtu edhe profesionale. “Pritja ka qenë shumë e mirë, organizimi i lojës ishte i nivelit më të lartë pasi kishim të bëjmë me Ligë të Kampionëve. E veçanta ishte debutimi ynë në këtë garë në Kroaci, pasi ekipi i Dinamos ka një nivel shumë të lartë të lojës me lojtarë shumë cilësorë në radhët e tyre. Në ditën e ndeshjes ishte gjithçka sipas agjendës të cilës iu përmbahemi me profesionalizëm”. Në përballjen që u shënuan pesë gola, e ku luajti edhe një futbollist kosovar si Lirim Kastrati, u dhanë edhe tri penallti gjë që bëri që ndeshja të jetë mjaft e vështirë për katërshen kosovare. “Loja ishte e nivelit tjetër, kishte intensitet dhe situata të vështira për t’i zgjedhur për ne si referë. Ishin tri penallti dhe [Genc] Nuza ishte në vendin e duhur dhe mjaft i saktë, kur kemi bërë një ndeshje me shumë vendime te rëndësishme. Normal që nuk është e lehtë, por ne ia dolëm edhe në këtë rang garash”.

Katërshja: Fatlum Berisha, Genc Nuza, Bujar Selimaj dhe Dardan Çaka.

Gjithë paraqitja e bërë të martën pritet t'iu shërbejë si motiv për vazhdim tutje në punën që bëjnë, thotë Berisha - që më parë ka qenë edhe futbollist. Sipas tij, edhe në Kosovë paraqitja e bërë po vlerësohet nga njohësit e futbollit, por edhe nga shtëpia më e madhe e futbollit në Kosovë, FFK. “Jemi duke e prezantuar Federatën e Futbollit të Kosovës në mënyrën më të mirë të mundshme në arenën ndërkombëtare. Ne jemi të etur për sfida dhe çdo ditë e më shumë po motivohemi për punë, sepse jemi duke u vlerësuar lart për punën profesionale nga të gjithë sportistët në shtetin tonë”. Berisha pas kësaj sfide pret që besimi i UEFA-s ndaj tij, por edhe gjyqtarëve të tjerë nga Kosova, në muajt dhe vitet e ardhshme të jetë më i madh, pasi beson se kanë cilësi për të gjykuar në ndeshje të tilla./Klankosova.tv