Inteligjenca Artificiale mund të ndihmojë në diagnostikimin e sëmundjeve të rralla vite më herët

Inteligjenca Artificiale mund të jetë në gjendje të identifikojë pacientët që kanë sëmundje të rralla vite më herët sesa do të diagnostikoheshin zakonisht, thotë një studim i ri. Një program i sapo zhvilluar i AI ishte në gjendje të identifikonte me sukses njerëzit në rrezik të zhvillimit të një çrregullimi të rrallë imunitar, raportojnë studiuesit në Science Translational Medicine, transmeton Klan Kosova. Nga një grup prej 100 personash të gjykuar me rrezikun më të lartë nga programi i AI, 74 me shumë mundësi kanë këtë çrregullim, zbuluan studiuesit. Kjo tregon se Inteligjenca Artificiale potencialisht mund të përmirësojë rezultatet e këtyre njerëzve duke u dhënë atyre trajtim më të hershëm, thanë ata. "Pacientët që kanë sëmundje të rralla mund të përballen me vonesa të gjata në diagnozë dhe trajtim, duke rezultuar në testime të panevojshme, sëmundje progresive, strese psikologjike dhe ngarkesa financiare", tha në një njoftim për shtyp studiuesi Dr. Manish Butte. "Duke përdorur mjete (AI), ne zhvilluam një qasje për të përshpejtuar për diagnozën e pacientëve të padiagnostikuar duke identifikuar modele në të dhënat e tyre elektronike shëndetësore që ngjajnë me ato të pacientëve që dihet se kanë çrregullime", tha Butte, profesor në pediatri, gjenetikë njerëzore dhe mikrobiologji/imunologji në Universitetin e Kalifornisë, ShBA. Studiuesit u përqendruan në një koleksion të çrregullimeve të quajtura imunodefiçencë e zakonshme e ndryshueshme, ose CVID. Këto çrregullime shpesh i shmangen diagnozës për vite ose dekada. Çrregullimet CVID vlerësohet të prekin rreth 1 në 25,000 njerëz dhe zakonisht shkaktojnë mangësi të antitrupave dhe përgjigje të dëmtuara imune, thanë studiuesit.