Indi: Kompanitë e mëdha po u japin punëtorëve një ditë pushim për ta parë një film të ri

Me njerëzit që kërcejnë në rrugë dhe ndezin fishekzjarre, skenat ngazëllyese nuk do të kishin qenë të pavend në një film indian. Në fakt, ato ishin festimet e jetës reale të mijëra adhuruesve të kinemasë në Indinë e Jugut, teksa mirëpritën publikimin e fundit të filmit nga një prej superyjeve më të mëdhenj të vendit. "Jailer", një thriller aksioni nga aktori i njohur Rajinikanth, ka pushtuar rajonin që kur u shfaq në kinema të enjten dhe tashmë pritet të vendosë rekorde në arkë. Filmi është i pari në dy vjet që shfaq aktorin, i cili gëzon një status si gjysmëperëndi në mesin e fansave të tij, dhe aq e madhe ka qenë pritja që disa kompani t'i kenë dhënë stafit të tyre një ditë pushim për ta parë këtë projekt filmik. Kompania e arsimit me bazë në Kerala, Redbooks Abroad i dhuroi stafit të saj bileta falas për shfaqjen e parë, duke thënë në një memo të parë nga CNN se ishte një "ditë për t'u çlodhur, për t'u gëzuar dhe për t'u zhytur në magjinë e ekranit të argjendtë". “Shpresojmë që kjo ditë pushimi dhe eksperienca e filmit t'ju sjellë gëzim, relaksim dhe energji të përtërirë për të gjithë ju. Le ta vlerësojmë këtë moment dhe të krijojmë kujtime së bashku”, thuhet në memorandum. Një kompani tjetër, Le Hive, me qendër në shtetin jugor të Tamil Nadu, tha se po i jepnin stafit gjysmë ditë pushim për të "shmangur largimet e papritura të sëmura". Filmi mblodhi rreth 5 milionë dollarë në arkë të enjten, bazuar në vlerësimet e hershme, duke e bërë atë hapjen më të lartë për një film në gjuhën tamile në vitin 2023 deri më tani, sipas raporteve lokale.