Imazhi i kryeministres zelandeze duke përqafuar gruan myslimane bëhet temë diskutimi në Melbourne

Murali i punuar nga artistja Loretta Lizzio ka tërhequr vëmendje të madhe nga vende të ndryshme të botës dhe ka ngjallur polemika të shumta. Imazhi gjigant është pikturuar në ballin e një siloje e cila është e gjatë 25 metra dhe që ndodhet në Melbourne të Australisë, shkruan The Art Newspaper, transmeton Klan Kosova. Në këtë memorial është fiksuar imazhi i Kryeministres së Zelandës së Re, Jacinda Ardern, duke përqafuar një grua myslimane, pas sulmeve terroriste brenda dy xhamive në Zelandë të Re, ku mbetën të vdekur 51 persona. Ndërsa një peticion që kërkon heqjen e këtij murali është nënshkruar nga 14 mijë qytetarë. "Ne njerëzit e Melburnit nuk dëshirojmë që ky mural të jetë këtu. Ne e shohim këtë si të panevojshme për ta bërë. A duhet që ne të pikturojmë mural për secilin sulm terrorist?" Por artistja Lizzio ka thënë se "krimi mbi baza të urrejtjes është një problem global" dhe se projekti i saj ka të bëjë me dashurinë dhe pranimin e të gjithë atyre që quajnë Australinë shtëpi të tyre.

klankosova.tv