Hungaria tërhiqet nga Gjykata Ndërkombëtare Penale

Qeveria e Hungarisë ka shpallur tërheqjen e saj nga Gjykata Ndërkombëtare Penale (GJNP). Ky lajm është dhënë nga Gergely Gulyas, një zyrtar i lartë në qeverinë e kryeministrit Viktor Orban, disa orë pasi kryeministri izraelit Benjamin Netanyahu, i cili kërkohet nga GJNP-ja, mbërriti në Hungari për një vizitë shtetërore. Vendimi i Orban për të ftuar Netanyahu në vizitë ishte bërë menjëherë pas lëshimit të urdhërarrestit nga GJNP-ja në nëntor të vitit të kaluar. Kryeministri hungarez kishte thënë se ky vendim nuk do të kishte "asnjë efekt" për vendin e tij, sipas raportimeve nga BBC, transmeton Klankosova.tv. Në nëntor të vitit të kaluar, gjykatësit e GJNP-së shpallën se kishte "bazë të arsyeshme" që Netanyahu të mbante "përgjegjësi penale" për krime të supozuara lufte dhe krime kundër njerëzimit, që lidhen me luftën mes Izraelit dhe Hamasit. Netanyahu e ka quajtur këtë vendim si "antisemitik". Hungaria është një anëtare themeluese e GJNP-së, një gjykatë që ka 125 shtete anëtare. Shtetet si Shtetet e Bashkuara, Rusia, Kina dhe Izraeli nuk e pranojnë juridiksionin e saj. Gjykata Ndërkombëtare Penale ka autoritetin të ndjekë penalisht individë për akuzat e gjenocidit, krimeve kundër njerëzimit dhe krimeve lufte, në territorin e shteteve që janë palë të Statutit të Romës, traktatit themelues të saj. Izraeli refuzon juridiksionin e GJNP-së, por gjykata ka vendosur në vitin 2021 se ka juridiksion mbi Bregun Perëndimor të pushtuar, Jerusalemin Lindor dhe Gazën, pasi OKB-ja ka pranuar Palestinën si anëtare.