Hoxhaj: Derisa në Ankara mbahej samiti i NATO-s, Kurti në Greqi fliste për “zemërimin e Akilit” (VIDEO)

Deputeti i PDK-së, Enver Hoxhaj ka komentuar qëndrimin e kryeministrit në detyrë, Albin Kurti në Greqi.

Hoxhaj i ftuar në emisionin "Rubikon" në Klan Kosova tha se gjatë kohës sa Kurti qëndroi në Greqi, u mbajt samiti i NATO-s në Ankara në të cilën sipas tij Kosova mund të ishte ftuar edhe si vëzhguese. Ai tha se kjo situatë pasqyron situatën politike në të cilën ndodhet vendi.

"Paralelisht me qëndrimin e tij në Greqi, që tregon shumë se si po e menaxhon shtetin ka ndodhur samiti i madh në Ankara, samiti i NATO-s. Tema e takimit të Kurtit në Greqi ishte 'zemërimi i Akilit' dhe 'paralajmërimi i Kasandrës', tema e simpoziumit ku kishte marrë pjesë ai dhe kjo tregon realisht se në çfarë situate politike është vendi. Do thotë rezultati certifikohet dhe ne nuk e dimë se cili është qëndrimi i partisë e cila i ka fituar zgjedhjet, se si e sheh procesin politik se deri më tash nuk ka ndonjë deklarim. Në një kohë kur bota është e përmbysur dhe e pasigurtë dhe kryeministri ka kohë që të merret me tema të vogla intelektuale dhe Kosova mbetet e paftuar në samitin e NATO-s që ka pasur mundësi të ftohet edhe si vëzhgues", tha ai.

Hoxhaj tha se pret që skenari i njëjtë për formimin e institucioneve të ndodhë edhe këtë herë pas certifikimit të sotëm të rezultatit zgjedhor nga ana e KQZ-së.

"Mendoj që mund ta shohim skenarin e njëjtë që kemi parë në këto 15 muajt e fundit dhe ne si PDK presim fillimisht qëndrimin e subjektit të parë", tha deputeti i PDK-së.