Lajmet e fundit
Avokati Gregory Kehoe, dhe ekipi i tij kanë njoftuar se janë tërhequr nga mbrojtja e ish-presidentit të Kosovës, Hashim Thaçi.
Si shkak i këtij vendimi, është moskryerja e obligimeve financiare ndaj tyre.
Lidhur me këtë, për mediat ka folur vëllai i ish-presidentit, Idriz Thaçi, i cili tha se kontrata me kompaninë ligjore “Greenberg Legal Associates”, nuk është vazhduar në vitin 2024 për shkak të vështirësive financiare në mbulimin e kostos së të gjithë avokatëve të angazhuar si pjesë e mbrojtjes së Thaçit.
Ai ka deklaruar se avokat kryesor i Thaçit, tani e tutje, do të jetë avokati i njohur me prejardhje kroate, Luka Mishetiq.
Rreth temës së mospagesës, në Info Magazine ka folur edhe avokati Taulant Hodaj.
Ai tha se kufizimi prej 1.3 milion eurove e caktuar nga Ministria e Drejtësisë mund të mos jetë e mjaftueshme për ekipin mbrojtës të Thaçit dhe të tjerëve.
"Mund të jetë shuma e mjaftueshme për një avokat, por jo për të gjithë avokatët që mund t'i angazhon. Gjithmonë kur kërkon fonde publike, i kanë limitet e caktuara. Edhe Gjykata Speciale nuk i financon të gjithë ata që do ti. Do t'i marrësh 50 vetë ekip mbrojtës, normal që nuk i financon", tha Hodaj.
"Kosova nuk ka pasur limite deri vonë, por tash i ka. Duhet të kihet parasysh kompleksiteti i rasteve, sidomos për ato të krimeve të luftës, meqë ligji ekziston, duhet të jenë më të hapur. Ndërsa për veprat kundër administrimit të drejtësisë, edhe unë mendoj që duhet të ketë më shumë kufizime".
"Mendoj që Ministria duhet të rrisë vlerën që mund t'u japë avokatëve që përfaqësojnë për vepra të krimeve të luftës, sidomos në rastin e Thaçit dhe të tjerëve, e të kufizojë për veprat tjera", theksoi avokati Hodaj. /Klankosova.tv
https://klankosova.tv/terheqja-e-mbrojtjes-se-thacit-vellau-i-tij-konfirmon-se-luka-mishetiq-tutje-eshte-avokat-kryesor-i-tij/
