'Haradinaj vs kandidati i VV-së për president', Tahiri: Ky pozicion e zhbllokon Kosovën

Aleanca nuk po kërkon poste politike për të mbështetur zhbllokimin e institucioneve, por zotime konkrete për disa çështje që i konsideron jetike për vendin, ka deklaruar deputeti i rizgjedhur i kësaj partie, Besnik Tahiri.

Në një intervistë për Ekonomia Online, Tahiri po ashtu komentoi deklaratat e deputetes së rizgjedhur nga Lëvizja Vetëvendosje, Arbërie Nagavci, e cila kishte kritikuar mundësinë e mbështetjes së Ramush Haradinajt për president, transmeton Klankosova.tv.

“Gjuha e Vetëvendosjes është gjuha më e ulët politike në historinë parlamentare. Ata janë kampionë të gjuhës së tillë. Ramush Haradinaj asnjëherë s’ka lypë votë. Asnjëherë s’ka thënë ‘unë jam kandidat’. Ka thënë: ‘Për me u zhblloku Kosova, për mos me mbetë peng, në qoftë se opozita e mbështet kandidaturën e tij, atëherë do të ketë garë zgjedhore’. Pra, ky pozicion së paku do ta zhbllokonte Kosovën. Nuk dihet kush do të fitonte, mirëpo do të kishte një kandidat për president nga opozita dhe një kandidat prej tyre. Nuk ka të bëjë asgjë me çka ka thënë ajo, as s’kemi lypë votë. Ne kemi thënë që nuk mundemi me vazhdu me një pozicion ku një parti do t’i marrë tri pozicione, me i zaptu tri pozicionet, sepse atëherë do të thotë me e kthyer shtetin parlamentar në një shtet autoritar”, u shpreh ai.