Gjirokastër, rikthehen arkeologët, gjenden dëshmi historike të lashtësisë

Në kalanë e Gjirokastrës, pas rreth 30 vitesh janë rikthyer arkeologët ndërsa punohet për evidentimin e gjetjeve të reja, të cilat hedhin dritë mbi historikun e kësaj kështjelle. Ekspedita arkeologjike e Institutit Kombëtar të Trashëgimisë Kulturore të Shqipërisë është në ditët e para të gërmimeve ndërkohë që puna kërkimore dhe studimore do të vazhdojë përgjatë muajit korrik. Aktualisht kërkimet arkeologjike janë përqendruar në afërsi të hyrjes kryesore të kalasë ndërsa jashtë murit rrethues janë zbuluar fragmentet e para të një kulle guri që mendohet se i përket shekujve IV-VI. Arkeologët krahas zbulimit dhe evidentimit të gjetjeve të ndryshme synojnë të shtojnë numrin e vizitave nga turistët në këtë kala. Kalaja, si histori e lidhur me qytetin e Gjirokastrës, përmendet për herë të parë në vitin 1336. Historianët mendojnë së ekzistenca e kësaj kështjelle është më e hershme. Kalaja e Gjirokastrës është monumenti më i vizituar në vendin tonë ndërsa shërben si qendër e organizimit të aktiviteteve kulturore me përmasa kombëtare dhe ndërkombëtare. / abcnews.al/