Lajmet e fundit
Bregdeti i Gazës, dikur destinacion për pushime familjare, është kthyer në shtëpi të përkohshme për dhjetëra mijëra persona që kanë humbur gjithçka në luftë.
Ata tani përballen me kushte të tmerrshme, të përkeqësuara nga dimri i ashpër dhe mungesa e ndihmave bazike.
Stuhitë dimërore po shkatërrojnë tenda të ndërtuara me copa të holla materiali.
Mohammed al-Halabi, banor në Deir al-Balah, rrëfen tmerrin: “Deti na mori gjithçka—batanijet, bukën, gjithçka. Madje shpëtuam një foshnjë dy muajshe që po tërhiqej drejt detit”.
Mjerimi dhe sëmundjet në rritje Sipas OKB-së, 90% e të zhvendosurve jetojnë në tenda, me temperaturat që bien në nivele alarmante, raporton BBC, transmeton Klankosova.tv.
Në Khan Younis, Shaima Issa tregon për fëmijët e saj që vuajnë nga të ftohtit dhe sëmundjet: “Fëmijët e mi janë të ngrirë.
Vajza ime ka temperaturë dhe të gjithë këtu janë të sëmurë e kolliten.” Banorët përballen me përmbytje nga shirat dhe kanalizimet. Salwa Abu Nimer, një nënë tjetër, qan teksa thotë: “Nuk kemi ushqim, ujë apo strehim.Uji hyn në tendë dhe mbetemi me rroba të lagura. Nuk ka jetë më.”
Mungesa e ndihmave dhe kaosi në shpërndarje Gjendja humanitare në Gaza përshkruhet si “katastrofike.”
Radhët për ushqime dhe bukë janë të gjata, me njerëz që luftojnë për mbijetesë.
Hanan al-Shamali, një grua nga veriu, tregon për betejën e saj për një bukë: “Shkoj çdo mëngjes te furrat. Ndonjëherë e gjej bukën, por shumicën e rasteve jo.
Nuk mund t’i ushqej jetimët që kujdesem.” Ndërkohë, furnizimet humanitare që kalojnë nëpër pikën kufitare Kerem Shalom shpesh përfundojnë të plaçkitura nga banda të armatosura.
Agjencitë ndërkombëtare, përfshirë UNRWA, kanë pezulluar shpërndarjet për shkak të mungesës së sigurisë.
Luftë pa fund, shpresë e shuar Përballë mungesës së ushqimit dhe ndihmave, tregjet janë bosh dhe njerëzit luftojnë për mbijetesë.
Antoine Renard nga Programi Botëror i Ushqimit, përshkruan situatën: “Nivelet e urisë dhe shkatërrimit janë më të këqijat ndonjëherë.
Njerëzit nuk mund ta përballojnë më këtë.” Ndërsa lufta vazhdon pa një fund të qartë, dimri sjell vetëm më shumë vuajtje për popullin e Gazës.
