Futsall: Kosova humb kundër Armenisë por kalon në "Main Round"

Kombëtarja e Kosovës në futsall ka pësuar humbje në ndeshjen e tretë dhe të fundit në rrethin e parë kualifikues për Kampionatin Botëror 2024. Të përzgjedhurit e Arben Simitçiut pësuan humbje nga Armenia me rezultatin 1:2. Ndeshja u zhvillua në Varna të Bullgarisë. Melos Kelmendi me autogol dhe Vitinho shënuan në fitoren e armenëve. Ishte Kelmendi ai i cili e përmirësoi gabimin duke shënuar sërish. Pavarësisht humbjes, Kosova e ka siguruar kalimin për në “Main Round” apo fazën kryesore kualifikuese. Kosova tutje kalon si e dyta në Grupin C me 6 pikë, tri më pak se Armenia. Para humbjes së sotme, Kosova kishte shënuar fitore ndaj Bullgarisë me rezultat 2:0 dhe ndaj Skocisë me rezultat 4:1.