Fundjavë e flaktë në Serie A, luhet derbi Milan-Inter

Xhiroja e 28-të në Serie A hapet sonte me ndeshjen Napoli–Torino, ndërsa fundjava sjell disa përballje interesante. Megjithatë, e gjithë vëmendja është tek derbi i madh Milan–Inter që luhet të dielën në mbrëmje. Kampioni në fuqi Napoli pret Torinon sonte në orën 20:45, në një duel ku napolitanët kërkojnë pikë të rëndësishme për objektivat e sezonit, ndërsa Torino synon të prishë planet e vendasve. Të shtunën, java vazhdon me përballjen Cagliari-Como në orën 15:00, ku të dy skuadrat luftojnë për pikë të rëndësishme në pjesën e poshtme të tabelës. Më pas, Atalanta pret Udinesen në orën 18:00, në një sfidë ku bergamaskët synojnë të vazhdojnë garën për zonën evropiane. Në mbrëmje, Juventusi përballet me Pisën në orën 20:45, me torinezët që konsiderohen favoritë në letër dhe kërkojnë të mos humbasin hapin me rivalët në krye. Të dielën, java nis me ndeshjen Lecce–Cremonese në orën 12:30, ndërsa në orën 15:00 luhen dy përballje të tjera: Bologna–Verona dhe Fiorentina–Parma. Në orën 18:00, Genoa pret Romën në një duel ku verdhekuqtë synojnë tri pikë të rëndësishme në garën për zonën Champions. Por kulmi i kësaj jave është pa dyshim derbi i madh i Milanos mes Milanit dhe Interit, që zhvillohet të dielën në orën 20:45 në “San Siro”. Ky do të jetë një tjetër kapitull i “Derby della Madonnina”, një nga përballjet më të famshme në futbollin botëror. Interi vjen në këtë derbi si lider i kampionatit dhe me një avantazh të rëndësishëm prej rreth 10 pikësh ndaj rivalit të qytetit. Skuadra zikaltër po kalon një sezon shumë të mirë dhe një fitore në këtë përballje do ta afronte edhe më shumë me titullin e kampionit. Nga ana tjetër, Milani renditet i dyti dhe e sheh këtë ndeshje si një mundësi të madhe për të rihapur garën për titull. Kuqezinjtë kanë nevojë për një fitore për të ngushtuar diferencën dhe për t’i dhënë një tjetër drejtim sezonit. Derbi i Milanos është gjithmonë një ndeshje speciale, ku forma dhe klasifikimi shpesh humbasin rëndësinë. Rivaliteti i madh mes dy klubeve, atmosfera elektrizuese në stadium dhe yjet në fushë premtojnë një spektakël të vërtetë për tifozët e futbollit.