Foda: S’kemi frikë por kemi respekt për Zvicrën – kualifikimi në Botëror do të ishte diçka e madhe për ne

Trajneri i kombëtares së Kosovës, Franco Foda, ka folur përpara ndeshjes së nesërme ndaj Zvicrës ku tha se “Dardanët” nuk do të kenë frikë ndaj lojtarëve zviceranë. Foda tha se as lojtarët e Zvicrës nuk do të kenë frikë nga ata të Kosovës, por tha se do të kenë respekt, ashtu siç do të kenë edhe kundërshtarët e tjerë të Kosovës. “Nuk mendoj se lojtarët e Zvicrës do të kenë frikë, sepse e dinë se janë një ekip i fortë, por do të kenë respekt për ne, ashtu siç do të kenë edhe kundërshtarët e tjerë që do na kenë përballë”. “As ne nuk jemi të frikësuar për Zvicrën. Jemi të vetëdijshëm për forcën që ka. Ka treguar paraqitje të mira në botërore dhe evropiane, por shpresojmë të arrijmë diçka të madhe”, tha Foda, njofton Klankosova.tv. Tutje, Foda u shpreh se kualifikimi i Kosovës në Kampionat Botëror do të ishte diçka e madhe për “Dardanët”. “Është rrugë e gjatë, kemi kundërshtarë të fortë në grup. Futbolli ka dëshmuar që ka shumë tregime. Shpresoj ta bëjmë një gjë të tillë. Kam dëgjuar që ka pasur atmosferë të mirë në ndeshjet ndërmjet Kosovës dhe Zvicrës. Kemi parasysh që do ta kemi sërish përkrahjen”. “Shpresoj të kemi sa më shumë shikues në anën tonë. Dhe do të jetë një detyrë që t’i kënaqim me lojë këta shikues. Presim të ndahen të kënaqur. Do  të luajmë me një stil më të hapur dhe të arrijmë t’i gëzojmë tifozët”, tha Foda.