Lajmet e fundit
Ministri i Kulturës, Rinisë dhe Sportit, Kujtim Shala, në ambientet e Bibliotekës Kombëtare të Kosovës, ka zhvilluar një takim bashkëbisedues me drejtorin e kësaj biblioteke, drejtuesit e Shoqatës së Botueseve të Kosovës dhe ata të Shoqatës së Bibliotekarëve, me të cilët ka biseduar rreth dy nismave të reja të MKRS-së për themelimin e Qendrës së Librit dhe Qendrës për Promovimin e Kulturës.
Shala ka kërkuar bashkëpunim dhe bashkërendim të kapaciteteve dhe mundësve, nga të gjitha institucionet dhe organizatat e ndryshme, në funksion të realizmit sa më të mirë dhe sa më funksional të këtyre dy nismave, me të cilat synohet të rregullohen më specifikisht, çështja e librit, përkthimeve dhe e promovimit të kulturës në përgjithësi, transmeton Klan Kosova.
Shala është shprehur se me këto dy nisma, MKRS-ja synon t’i avancojë politikat kulturore në fushat përkatëse, gjithnjë në përkim me praktikat e njohura evropiane, dhe në funksion të promovimit e avancimit të mëtejmë të kulturës sonë.
Ai më tutje është shprehur se këto nisma ndihmojnë në pavarësimin e politikave në raport me librin dhe kulturën, meqë synohet të krijohet një mekanizëm, i cili i rregullon këto çështje, dhe po ashtu krijon më shumë pavarësi dhe më shumë mundësi për zhvillimin e kulturës dhe promovimin e saj në arenën ndërkombëtare.
Drejtuesit e Shoqatës së Botueseve dhe ata të Shoqatës së Bibliotekarëve, mbështetën këto dy nisma, si dhe u zotuan se do të bashkëpunojnë ngushtë me MKRS-në, gjatë gjithë procesit, dhe me qëllim që këto dy nisma të realizohen sa më mirë dhe në dobi të kulturës së Kosovës.
