Fjolla Muhaxhiri - Agusholli, autorja e verbër që shkroi librin e dytë në telefon (VIDEO)

Emisioni i së martës Ora e Pasdites, iu dedikua autores Fjolla Muhaxhiri- Agusholli, e cila humbi shikimin gjatë jetës. Ajo, në studio solli librin e saj biografik, për të cilin sigurisht që dhuroi edhe tregime. “Ky libër është i dyti me radhë. I pari është botim autorial dhe me poezi, ndërsa ky është botimi i parë autobiografik. Kam marrë çmim si libri më i mirë në qytetin e Pejës, pastaj kam marrë çmime edhe në Gjakovë. Kam pasur suksese shumë me poezitë e librit të parë, dhe kjo ka qenë një ndër shtysat kryesore që unë të vazhdoj tutje”, u shpreh autorja, raporton Klankosova.tv. Muhaxhiri-Agusholli, përgjatë bisedës me moderatoren Njomza Aliu- Kajtazi, tregoi se sa kohë iu desh të punojë për librin. “Një vit e gjysmë më është dashur kohë për ta botuar librin. E nisa si tregim të shkurtër, por duke e ndarë në kapituj, u zhyta më shumë në ngjarjet të cilat i kisha në mendje, ato ishin të mijat dhe e dija se çka dua të shkruaj dhe ta paraqes, dhe kështu më lindi ideja që pse mos me bë roman”, tha autorja. Shkrimtarja rrëfeu edhe për mënyrën se si e ka shkruar librin. “E kam shkruar në telefon, pra falë teknologjisë, me ‘Voice over’ që e ka iPhone, dhe e cila na ka ndihmuar të gjithëve të verbërve që përdorim vet çfarëdo lloj aplikacioni apo çka do që ne e kemi të nevojshme të përdorim”, u shpreh ajo. Për ta shikuar të plotë intervistë me autoren Fjolla Muhaxhiri - Agusholli, klikoni në linkun e mëposhtëm. https://www.youtube.com/watch?v=-RxsGJhFgC4