Fituesi i Eurovisionit dëshiron përjashtimin e Izraelit nga gara

Fituesi i këtij viti i konkursit të këngës në Eurovision, këngëtari austriak JJ, ka bërë thirrje që Izraeli të përjashtohet nga konkursi i vitit të ardhshëm. Ai gjithashtu shprehu keqardhje për pjesëmarrjen e Izraelit në konkursin e këtij viti pavarësisht luftës në Gaza. Eurovision është përballur me kritika për lejimin e Izraelit të marrë pjesë në konkurs pavarësisht luftës shkatërruese në Gaza. Këtë vit, aktivistët pro-palestinezë organizuan protesta gjatë ekstravagancës në Zvicër gjatë fundjavës. Rusisë nuk i është lejuar të marrë pjesë në Eurovision që nga pushtimi i Ukrainës në vitin 2022, raporton “The Guardian”, transmeton Klankosova.tv. “Është shumë zhgënjyese të shohësh që Izraeli vazhdon të marrë pjesë në konkurs”, tha kontratenori 24-vjeçar për të përditshmen spanjolle “El Pais”. “Do të doja që Eurovision i vitit të ardhshëm të zhvillohej në Vjenë pa Izraelin”, shtoi ai. “Por topi është në fushën e organizatorit, Unionit Evropian të Transmetimeve (EBU)”, tha ai. “Ne, artistët, mund të shprehim vetëm pikëpamjet tona mbi këtë temë”. JJ, emri i vërtetë i të cilit është Johannes Pietsch, bëri thirrje gjithashtu për “transparencë më të madhe” në lidhje me votimin e publikut, pasi këngëtari izraelit Yuval Raphael u rendit në vendin e dytë. Raphael i mbijetoi sulmit të 7 tetorit 2023 ndaj Izraelit që shkaktoi luftën në Gaza, duke u fshehur nën trupa ndërsa persona të armatosur të Hamasit sulmuan një festival muzikor, duke vrarë qindra. “Këtë vit, gjithçka ndodhi në një mënyrë shumë të çuditshme”, tha JJ. Këngëtari u përball me reagime negative për komentet e tij në Austri, një nga mbështetësit më të vendosur të Izraelit në Evropë. Transmetuesi publik i vendit ORF u distancua nga komentet e tij, duke thënë se ato “pasqyronin një mendim personal”. JJ tha se “i vinte keq nëse komentet e tij ishin keqinterpretuar” përmes shtëpisë së tij diskografike Warner. Të hënën, kryeministri spanjoll, Pedro Sanchez, një nga kritikët më të hapur të qeverisë izraelite, tha se Izraeli duhet të përjashtohet nga Eurovisioni. Ai shprehu solidaritetin e tij me “popullin e Palestinës që po përjeton padrejtësinë e luftës dhe bombardimeve”. “Ajo që nuk mund të lejojmë janë standardet e dyfishta në kulturë”, tha Sanchez duke iu referuar ndalimit të Rusisë. /Klankosova.tv