Fitorja e radhës, Bakaj shumë i fortë për kundërshtarin kolumbian

Roberto Bakaj, ka shënuar një tjetër fitore të rëndësishme në karrierën e tij profesioniste, duke mposhtur boksierin kolumbian Brayan Santander në një përballje të zhvilluar në “BBC Arena” në Zvicër. Me këtë triumf, boksieri shqiptar, konfirmon formën e shkëlqyer dhe ruan një rekord perfekt që flet vetë: 16 meçe, 16 fitore. Në një atmosferë të zjarrtë dhe përballë një kundërshtari të fortë, ai u shfaq i përqendruar, i disiplinuar dhe dominues në ring. Qysh nga rundet e para, Bakaj tregoi qartësisht superioritetin e tij teknik dhe fizik, duke kontrolluar ritmin e ndeshjes dhe duke mos i lënë hapësirë kundërshtarit për të reaguar. Kjo fitore nuk është vetëm një sukses personal për të, por edhe një tjetër moment krenarie për sportin shqiptar. Me çdo ndeshje, ai po forcon pozitën e tij në boksin profesionist dhe po dëshmon se është një emër serioz, me ambicie të mëdha dhe potencial për skenën ndërkombëtare.