FFK thërret tifozët të marrin pjesë në stërvitjen e Kombëtares së Kosovës

Seanca e sotme stërvitore e Kombëtares së Kosovës, që do të mbahet në kampin nacional në Hajvali, është e hapur edhe për tifozë. Federata e Futbollit të Kosovës (FFK) ka bërë thirrje që tifozët të marrin pjesë në këtë stërvitje, për të bërë foto ose për të marrë nënshkrime prej futbollistëve të Kosovës. Stërvitja do të fillojë në orën 17:30 në Kampin Nacional në Hajvali. “Çfarë ka më të mirë sesa të shikosh talentin dhe pasionin e futbollistëve dardanë në aksion? Stërvitja e sotme do të jetë e hapur për publikun! Bëhuni pjesë e këtij momenti dhe pasuroni koleksionin tuaj të fotove me idhujt tuaj të futbollit! Mos harroni të merrni nënshkrimet e futbollistëve të preferuar e të ndani këtë moment të veçantë me ta”, thuhet mes tjerash në thirrjen e FFK-së. Kombëtarja e Kosovës të shtunën (9 shtator) do të përballet me Kombëtaren e Zvicrës me fillim nga ora 20:45 në “Fadil Vokrri”, ndeshje kjo e vlefshme për kualifikimet në Euro 2024 që do të mbahet në Gjermani.