Lajmet e fundit
Festivalit “Zambaku i Prizrenit” ka përfunduar në Gjykatën Themelore të Prizrenit. Ky festival tradicional, dyshohet se është keqpërdorur nga organizatorët e saj.
Të dyshuar kanë qenë edhe zyrtarët e Drejtorisë së Kulturës në Prizren, mirëpo për shkak të mungesës së provave, ndaj tyre kanë pushua hetimet. Në mesin e tyre ka qenë edhe kryesuesi i Kuvendit Komunal, Kujtim Gashi.
Ndërkaq, organizatori i festivalit, Bashkim Rakaj është i vetmi që nuk ka mundur t’i shpëtojë aktakuzës së Prokurorisë.
Zëdhënësja e Gjykatës Themelore në Prizren, Afërdita Kicaj thotë se lënda është në procedurë.
“Pranë Gjykatës Themelore në Prizren është në vijim procedura paraprake ndaj të pandehurit me iniciale B.R. nga fshati Vërmicë – Komuna e Prizrenit për shkak të dyshimit të arsyeshëm se ka kryer veprën penale të mashtrimit nga neni 335 par.1 të KP-së”, tregon Kicaj për PrizrenPress.
Ndërkaq, Kujtim Gashi, Lulëzim Ibri dhe Urim Ukimeri në mungesë të provave, janë liruar nga akuza.
“Gjykatën Themelore në Prizren, ndaj të pandehurve me inicialet K.G, L.I. dhe U.U., përkitazi me veprën penale të keqpërdorimit të pozitës apo autoritetit zyrtar nga neni 411 par.1 lidhur me nenin 31 të KP-së janë pushuar hetimet pasi që në bazë të provave të grumbulluara nuk është vërtetuar se të pandehurit kanë kryer veprën penale të cekur më lartë”, tregon ajo.
Hetimet ndaj festivalit “Zambaku i Prizrenit”, patën filluar në vitin 2014. /PrizrenPress
