Festimi i Endrick në golin ndaj PSG-së,  shkakton polemika me Hakimin

Talenti brazilian Endrick ishte protagonisti kryesor në fitoren 1-2 të Olympique Lyonnais ndaj Paris Saint-Germain në ndeshjen e zhvilluar në Parc des Princes, e vlefshme për Ligue 1. Sulmuesi i ri realizoi një gol dhe dhuroi një asist, duke qenë vendimtar në triumfin e skuadrës së tij në një nga sfidat më të forta të javës. Megjithatë, përveç performancës në fushë, vëmendjen e mori edhe festimi i tij pas golit, i cili u interpretua si provokues nga tifozët vendas, transmeton Klankosova.tv. Reagimi më i fortë erdhi nga mbrojtësi i PSG-së, Achraf Hakimi, i cili nuk e fshehu pakënaqësinë ndaj sjelljes së brazilianit. Pas përfundimit të ndeshjes, Hakimi sqaroi arsyet e reagimit të tij, duke theksuar se gjesti i Endrick nuk kishte lidhje me lojën. “Doja që ai të përqendrohej te futbolli, sidomos duke qenë një lojtar shumë i mirë. Kur bën gjëra që nuk kanë të bëjnë me lojën, kjo mund të acarojë, veçanërisht në një moment kur ne ishim pranë humbjes,” u shpreh Hakimi. Ngjarja ka ndezur debat në rrjetet sociale, ku tifozët janë ndarë mes atyre që e shohin festimin si pjesë të pasionit të futbollit dhe të tjerëve që e konsiderojnë të panevojshëm dhe provokues. Pavarësisht polemikave, paraqitja e Endrick konfirmon potencialin e tij të jashtëzakonshëm dhe rolin në rritje në skenën e futbollit europian.