Fëmijët nën 16 vjeç pa rrjete sociale në Britani: A duhet ta ndjekë edhe Kosova këtë shembull?

Në Parlamentin e Britanisë së Madhe po diskutohet një projektligj i ri që synon të kufizojë qasjen e fëmijëve nën moshën 16-vjeçare në të gjitha rrjetet sociale.

Projektligji parasheh gjithashtu rregulla më të rrepta për përmbajtjet që mund të konsumohen nga adoleshentët e grupmoshës 16 deri në 18 vjeç, transmeton Klankosova.tv. Gjatë emisionit “Ora Shtatë”, Diana Metushi e cilësoi këtë nismë si një hap të vonuar, duke theksuar se pasojat e përdorimit të pakontrolluar të rrjeteve sociale janë bërë të dukshme prej vitesh.

“Që nga evoluimi i rrjeteve sociale në mbarë botën, kemi fëmijë të cilët bien viktimë e rrjeteve sociale. Kemi shantazhim të vazhdueshëm seksual, në nivel global janë mbi 27 mijë raste të konfirmuara. Kemi rritjen e bullizimit, sidomos përmes ‘Snapchat’. Kemi rritje të dhunës në shkolla, pikërisht si shkak i rrjeteve sociale”, tha ajo si një nënë e shqetësuar.

Nga ana tjetër, eksperti i teknologjisë Besmir Semanaj theksoi se përdorimi i platformave të ndryshme digjitale shoqërohet me rreziqe të shumta për të rinjtë, veçanërisht në aspektin e privatësisë. Sipas tij, shpërndarja e të dhënave personale në internet mund të ekspozojë përdoruesit ndaj rreziqeve të ndryshme, ndërsa humbja e privatësisë mbetet një nga shqetësimet më të mëdha.