Federata Ndërkombëtare e Boksit mundohet të arsyetohet në lidhje me vendimin ndaj boksierëve kosovarë

Boksierët kosovarë edhe njëherë tjetër iu është mohuar e drejta për të marrë pjesë në një ngjarje kryesore sportive, këtë herë në Kampionatin Botëror, që është duke u zhvilluar në Uzbekistan, shtet që nuk e njeh pavarësinë e Kosovës. Federata e Boksit e Kosovës, disa ditë para se të filloj ky kampionat, njoftoi se vizat ende s’ishin lëshuar për boksierët kosovarë, dhe u desh që Federata Ndërkombëtare e Boksit të reagojë dhe të sigurojë vizat për sportistët kosovarë. Ky dëm i madh që po u bëhet boksierëve kosovarë po i lë edhe prapa, pasi të gjitha përgatitjet u kanë shkuar huq. Me problem të njëjtë u ballafaqua edhe Donjeta Sadiku, që nuk u lejua të udhëtojë drejt Indisë, pasi e njëjta nuk u pajis me vizë. Sekretari i përgjithshëm i IBA-s, George Yerolimpos, ka thënë se kanë bërë gjithçka që ka qenë e mundur por që autoritet e Uzbekistanit nuk e kanë miratuar. “Sa i përket Kosovës, ne bëmë gjithçka që ishte e nevojshme për të marrë vizën, por autoritetet e vendit nuk e miratuan atë”, tha Yerolimpos për insidethegames. Yerolimpos shtoi se “është jashtë fuqisë sonë”. Një zyrtar i Komitetit Organizativ Lokal (LOC) pohoi se situata e vizave nuk varet nga ata. "LOC u përpoq të akomodojë vendet edhe pas afatit të regjistrimit," tha zyrtari. “Viza është diçka me të cilën merret Ministria e Jashtme”. Komiteti Olimpik i Kosovës tha se ky është tjetër diskriminim për sportistët kosovarë, që shkaku i politikës po iu mohohet pjesëmarrja. “Tjetër diskriminim për sportistët tanë dhe sërish për boksierët tanë, të cilëve shkaku i politikës iu mohohet pjesëmarrja dhe mundësia për të fituar medalje në Kampionatin Botëror, që prej 1 majit mbahet në Tashkent të Uzbekistanit”, ka thënë ky komitet. /Klankosova.tv.