Emri i Ismail Kadaresë përjetësohet në Paris

Këshilli Bashkiak i Parisit ka votuar me unanimitet vendosjen e një pllake përkujtimore në nderim të kolosit të letrave shqipe, Ismail Kadare. Kjo pllakë do të vendoset në adresën 63 boulevard Saint-Michel – aty ku shkrimtari i madh shqiptar jetoi për vite me radhë së bashku me familjen e tij dhe ku shkroi disa nga faqet më të ndritura të letërsisë moderne shqiptare. Ky akt solemn nuk është thjesht një përkujtim personal për një prej figurave më të shquara të kulturës shqiptare, por edhe një njohje publike e peshës që Kadare pati në letrat botërore dhe në mbrojtjen e identitetit kulturor shqiptar. Përmes këtij vendimi, Parisi nderon Shqipërinë dhe kulturën e saj, duke e vendosur emrin e Ismail Kadaresë përkrah personaliteteve që kanë lënë gjurmë në historinë e qytetit dhe të njerëzimit. Emri i tij do të qëndrojë përgjithmonë në një nga bulevardet më të rëndësishme të Parisit, si simbol i krenarisë sonë kombëtare dhe i kontributit të vyer që kultura shqiptare i ka dhënë qytetërimit europian./Klankosova.tv