Një episod i pazakontë ka ndodhur në Sky Sport pas ndeshjes së fundjavës mes Interit dhe Veronës, ku autogoli që vulosi fitoren 1-2 të zikaltërve është bërë shkak për largimin e dy gazetarëve praktikantë nga televizioni italian.
Gjatë transmetimit të drejtpërdrejtë, të rinjtë që po ndihmonin në studio nuk arritën të përmbahen nga gëzimi kur Interi shënoi golin e fitores, duke festuar hapur përpara kamerave. Megjithatë, ata harruan se ishin “live”, dhe momenti u regjistrua e u shpërnda menjëherë në rrjete sociale, duke ngjallur reagime të shumta.
Pas incidentit, drejtori i Sky Sport, Federico Ferri, thuhet se ka ndërhyrë menjëherë, duke vendosur që praktikantët të dërgohen në shtëpi. Në një komunikim të brendshëm me redaksinë, Ferri ka theksuar se situata të tilla nuk duhet të përsëriten, duke shtuar: “Kur njëri prej nesh turpërohet, turpërohemi të gjithë.”
Ai gjithashtu u ka kërkuar punonjësve të tjerë të tregohen më të kujdesshëm dhe profesionistë në çdo transmetim televiziv, për të ruajtur imazhin e kanalit sportiv.
●●●
ASHKRIMI NGA
albert
Editorial nga Klan Kosova — ndjek sport dhe zhvillimet e tjera kryesore të vendit.
