Dy filma nga Kosova përzgjidhen për garim në Festivalin e Venedikut

Qendra Kinematografike e Kosovës ka njoftuar që dy projekte filmike kosovare janë përzgjedhur për të garuar në Festivalin e Filmit të Venedikut. Bëhet fjalë për filmin  e regjisores kosovare, Luana Bajrami, “Bota jonë”, dhe atë të “Housekeeping For Beginners” nga Goran Stolevski. “2 projekte filmike, janë përzgjedhur pët të garuar në Festivalin e Filmit të Venedikut, i cili këtë vit gjithashtu shënon edicionin e 80-të jubilar. Festivali i Venedikut është festivali më i vjetër i filmit në botë, i cili mbahet nga data 30 gusht deri me 9 shtator në Venedik të Italisë dhe është njeri ndër 5 festivalet kryesore të filmit në botë”, thuhet në njoftimin e QKK-së. “Filmi ‘Bota Jonë’ nga skenaristja dhe regjisorja Luana Bajrami do të garojë në kategorinë ‘Orizzonti Extra’”. Sidoqoftë, të dy filmat vijnë si rrjedhojë e bashkëpunimit, i pari mes Kosovës dhe Francës, ndërkaq i dyti mes Kosovës dhe Maqedonisë Veriore. “Filmi është financim i Qendrës Kinematografike të Kosovës dhe Aide au Cinéma du Monde, pra është bashkëprodhim në mes të Republikës se Kosovës dhe Republikës së Francës. Vlen të theksohet se ky është filmi i parë i prodhuar pas nënshkrimit të marrëveshjes bilaterale për bashkëprodhim filmik me shtetin e Francës, nënshkruar vitin e kaluar. Në rolet kryesore të filmit luajnë aktoret: Elsa Mala, Albina Krasniqi, Don Shala dhe Aurora Ferati, ndersa producente e filmit është Valbona Rrahmani”. “Filmi ‘Housekeeping For Beginners’– nga regjisori Goran Stolevskit, është përzgjedhur te garojë në kategorinë “Orizzonti”. “Housekeeping For Beginners është një bashkëprodhim minoritar në mes Maqedonisë së Veriut dhe Kosovës. Producente e këtij filmi nga Kosova është Blerta Basholli, regjisorja jone e shumeshperblyer, ndërsa në film luan aktorja e famshme kosovare Rozafë Çelaj”. “Luana Bajrami, përveç se do të garojë me filmin e saj te gjatë në garën Orizzonti Extra, ajo është edhe aktore në filmin e metrazhit të shkurtër të regjisorit nga Shqipëria Erenik Beqiri “A short trip”(Shqiperi/Francë), i cili do te garojë në kategorinë Orizzonti short”.