Drita sonte e kërkon kualifikimin në rrethin e dytë të Champions

Kampionia e Kosovës në futboll, Drita, sonte do të zbresë në fushën e blertë në kërkim të kualifikimit për rrethin e dytë kualifikues në Champions League. Skuadra e drejtuar nga Zekirja Ramadani, e mposhti ekipin FC Differdange 03 në stadiumin “Fadil Vokrri” në Prishtinë javën e kaluar me rezultat 1:0 në ndeshjen e parë falë golit të realizuar nga Arb Manaj. E tash, në ndeshjen e kthimit, gjilanasit do të mundohet ta ruajë këtë avantazh në ndeshjen e kthimit, e cila do të luhet në stadiumin “Stade Municipal de la Ville”. Drita në fakt do ta kërkojë kalimin në rrethin e dytë kualifikues të Ligës së Kampionëve për herë të parë, ndërsa kjo është pjesëmarrja e saj e tretë në kualifikimet e Championsit. Kurse, sa i perket kundërshtarit të Dritës, kjo është hera e parë që Differdange merr pjesë në fazën kualifikuese të garës më prestigjioze të futbollit evropian, ndërsa në edicionin e kaluar mori pjesë në Ligën e Konferencës. Ndeshja mes FC Differdange 03 dhe Dritës do të nisë prej orës 20:00. E sonte do të luajnë edhe skuadrat e tjera shqiptare. Kampionia e Shqipërisë, Egnatia do ta vizitojë ekipin Breidablik, në ndeshjen që do të nisë prej orës 21:00. Ekipi shqiptar e ka një kapital prej një goli, të cilin do të mundohet ta ruajë njëjtë si Drita. Kurse, skuadra tjetër shqiptare, Shkëndija e Tetovës do t’i bëjë konak skuadrës TNS. Dueli i parë mes tyre kishte përfunduar baras pa gola, 0:0, ndërsa tash “Kuqezinjtë” përpara publikut të tyre duan ta sigurojnë kualifikimin tutje.