Djaloshi thyen kavanozin 3500-vjeçar, muzeu nuk e fajëson

Një djalë kureshtar 4-vjeçar theu aksidentalisht një kavanoz 3500-vjeçar, teksa familja e tij po vizitonte një muze në Izrael. Djali, i cili nuk u identifikua, ishte afër hyrjes së Muzeut Hecht në Haifa të premten kur familja hasi në një enë që daton në epokën e bronzit, afërsisht nga viti 2200 dhe 1500 para Krishtit. Babai i djalit, i identifikuar vetëm me emrin e tij të parë Alex, tha se djali i tij "e tërhoqi pak kavanozin" sepse ishte "kurioz për atë që kishte brenda". Tërheqja ishte e mjaftueshme për ta bërë kavanozin të binte, duke u përplasur në copa në dyshemenë e muzeut. "Isha në shok", tha Alex për BBC, duke shtuar se mendimi i tij i parë ishte: "Nuk ishte fëmija im ai që e bëri atë". Muzeu tha se artifakti nuk ishte i mbështjellë në xham ose mbrojtje shtesë për shkak të besimit të tij se njerëzit duhet të shijonin sendet e tij historike pa pengesa. "Ka raste kur objektet e ekspozuara dëmtohen qëllimisht dhe raste të tilla trajtohen me ashpërsi të madhe, duke përfshirë përfshirjen e policisë. Megjithatë, në këtë rast, situata nuk ishte e tillë. Kavanozi u dëmtua aksidentalisht nga një fëmijë i vogël që vizitonte muzeun", thanë nga muzeu, sipas NBC News, transmeton Klan Kosova. Kavanozi, i cili ishte projektuar për të transportuar mallra të tilla si vaj ulliri dhe verë, dukej se ishte bërë në rajonin e Kanaanit dhe ishte para mbretit Solomon dhe mbretit David. Pavarësisht dëmeve, muzeu tha se ata besonin që kavanozi mund të restaurohej dhe të kthehej për t'u ekspozuar edhe një herë. Për të treguar se nuk ka ndjenja të hatërmbetjes, muzeu ftoi fëmijën dhe familjen për një turne të organizuar.