“Dita e Re” nga Barbara Prenka hapet nesër në Gjakovë

Në Galerinë e Arteve - Pallati i Kulturës “Asim Vokshi” në Gjakovë, më 23 prill 2026 nga ora 18:00, do të bëhet hapja e ekspozitës së përkohshme të veprës “Dita e Re” nga Barbara Prenka. Në këtë ekspozitë paraqitet puna e artistes si një proces zbulimi dhe gërmimi në historitë e kaluara ku me anë të rrëfimeve të gjyshes, të nënës dhe të hallave ajo arrin të rikrijojë rrugën e përshkuar nga familja e saj gjatë luftës. Fotografitë familjare të rigjetura, janë kthyer në qilima të vërtetë, duke i printuar ato në tekstil. Puna e Barbarës nuk përfundon vetëm në kriijimin e qilimave por shndërrohet në një performancë e cila dokumentohet hap pas hapi pasi ajo fokusohet në natyrën bashkëvepruese të kësaj pune dhe në forcimin e marrëdhenies midis grave të familjes. Në mënyre analoge fijet që lidhin qilimin, dikur të djegur, vazhdojnë të lidhin marrëdhëniet midis brezave, të shkuarën, të tashmen dhe ditën e re që do të vijë. “Dita e Re” është realizuar në bashkëpunim me Brigita Gecaj, Zoja Markaj, Leze Quni, Marija Prenka dhe Roza Prenka. Kjo vepër është pjesë e ekspozitave të organizuara nga Qendra e Dokumentimit Kosovë dhe ka si qëllim ballafaqimin me të kaluarën nëpërmjet veprave dhe krijimeve artistike./Klankosova.tv