Dietologia zbulon përfitimet e të ngrënit të ëmbëlsirës çdo ditë

Shumica besojnë se heqja e ëmbëlsirës do të ishte një hap kyç drejt një diete më të shëndetshme, por dietologia Mackenzie Burgess thekson pikërisht të kundërtën. “Unë ha ëmbëlsirë çdo ditë – dhe nuk ndjej asnjë faj për këtë”, tha ajo për Parade. Në vend që të inkurajojë ndalimet, thekson se ekuilibri është çelësi: shijimi i ëmbëlsirave mund të na ndihmojë të mos zhvillojmë një marrëdhënie obsesive me ushqimin dhe të mos ndihemi të privuar, gjë që mbështet një marrëdhënie të shëndetshme me ushqimin në planin afatgjatë, shkruan Index.hr, transmeton Klankosova.tv. Një nga problemet më të mëdha me kufizimet strikte është se ato shpesh çojnë në mbingrënie. “Kur ia ndalojmë vetes diçka, dëshira për të bëhet edhe më e fortë”, shpjegon dietologia, duke shtuar se shijimi i moderuar i të gjitha llojeve të ushqimeve ul statusin e tyre ‘të ndaluar’ dhe e bën më të lehtë kontrollin e oreksit. Pra, shijimi i ëmbëlsirave si pjesë e një diete të ekuilibruar mund të ketë përfitime fizike dhe psikologjike. Ushqyerja nuk është vetëm çështje lëndësh ushqyese, por edhe kënaqësie. "Nëse hani vazhdimisht në një mënyrë që duket e ngurtë ose pa gëzim, ndoshta nuk do të jeni në gjendje ta mbani atë për një kohë të gjatë," thotë Burgess. Hulumtimet mbështesin idenë se kënaqësia me ushqimin është e lidhur me zakone më të mira të të ngrënit. Kur hamë me kënaqësi dhe pa faj, marrim vendime më të shëndetshme në planin afatgjatë. Për ata që kanë ëmbëlsirë, dietologia rekomandon ëmbëlsira të thjeshta dhe me vlera ushqyese si kos grek me mjaltë dhe manaferra, çokollatë të zezë, akullore proteinike, kombinime frutash me gjalpë arra, apo edhe sasi të vogla ëmbëlsirash klasike. “Është koha të ndaloni së demonizuari ëmbëlsirat dhe të mësoni t'i përfshini ato në një mënyrë jetese të shëndetshme – pa faj”, përfundoi Burgess.