Dhoma e rrugëtimit të UÇK-së, instalacion në ‘’Muslim Mulliqi Prize 2018’’

Galeria Kombëtare e Kosovës, ditë më parë ndau çmimin ''Muslim Mulliqi'' për artistët të cilët konkuruan me veprat e tyre artistike për ekspozitë. Njëra ndër to pjesë e ekspozitës ''A janë histori kujtimet tona?'' ishte edhe vepra e artistit të ri, Behar Brahimi, me titull ''Dhoma e të pagjeturit'', transmeton Klan Kosova. Sipas tij ky instalacion artistik, mund të ngushëllojë sadopak rreth mendimeve se ku mund të ndodhen më të dashurit e zhdukur të familjeve të cilat pësuan nga lufta e fundit në Kosovë në të cilin shfaqet dhe rrugëtimi i gjatë i pjesëtarëve të Ushtrisë Çlirimtare të Kosovës. E veçanta e Dhomës së të Pagjeturit, është se ajo mundëson shikim të palimituar drejt qiellit, për të cilën artisti Behar Brahimi ka thënë  për klankosova.tv,  se brenda saj mund të ndalen emrat e të gjithë të zhdukurve  me shpresën që një ditë ata do të kthehen. ''Me brengën dhe shqetësimin dhe pikëllimin që kemi për të dashurit tanë, ne shpesh e gjejmë veten në një vend në të cilin nuk e dijmë as ne se si kemi arritur aty'', është shprehur artisti Brahimi. Ai thotë se zgjodhi këtë temë për të realizuar në instalacion, pasi edhe 20 vjet që nga përfundimi i luftës dhimbja për të pagjeturit është ende e freskët, njofton Klan Kosova. Ndonëse Galeria Kombëtare ndau çmimin ''Muslim Mulliqi'', vepra e artistit që trajton jetën dhe veprën e një pjesëtari të Ushtrisë Çlirimtare të Kosovës, nuk arriti të jetë njëri ndër fituesit e kësaj ekspozite, porse instalacionin mund ta gjeni të ekspozuar tek Galeria Kombëtare e Kosovës e cila do të jetë e hapur deri në fillim të muajit nëntor. Fitues të çmimit ''Muslim Mulliqi u shpallën Artan Hajrullahu dhe Valdrin Thaqi. Çmimi mban emrin e Muslim Mulliqit, piktorit të njohur ekspresionit nga Gjakova, i cili vdiq në vitin 1998.