Derbi Inter - Napoli mbyllet baras, gara për titull mbetet e hapur

Nuk kishte fitues në spektaklin e luajtur në Guiseppe Meazza. Në ndeshjen numër 160 në histori të këtyre klubeve të mëdha italiane, pamë një superpërballje, të luftuar në çdo top, vrapim dhe dëshirë të skajshme për fitore, me Interin që dominoi në pjesën e parë, edhe pse ajo u mbyll 1-1. Pas iniciativës së plotë dhe presionit të lartë të vendësve, Inter kaloi në epërsi me golin e mbrojtësit ndoshta më të mirë të majtë aktualisht në Evropë, Federico Di Marco. Ishte ky goli i tetë i Interit në 15 minutat e para të ndeshjeve. Napoli u tregua skuadër e durueshme dhe e priti momentin e vet. Asistimin e bukur të Eljif Elmas, e ktheu në gol lojtari më i mirë i shpallur në Itali edicionin e kaluar, skocezi Scott McTominay. Pjesa e dytë nisi me Napolin skuadër më kërkuese, dhe diktuan tempin e lojës për më shumë se 20 minuta, mirëpo ishin neroazzurët që shënuan. Amir Rrahmani e shkeli në këmbë Henrikh Mkhitaryan, dhe pas rishikimit në VAR, gjyqtari Daniele Doveri akordoi penallti. I pagabueshëm ishte Hakan Calhanoglu që i dha epërsinë e dytë Interit. U mendua se Napoli nuk do të ketë më forcën e duhur, sidomos kur edhe trajneri i tyre Antonio Conte u përjashtua për shkak të protestës ndaj gjqtarit, mirëpo njëri ndër më të mirët në Evropë, Scott McTominay e barazoi rezultatin në 2-2 që ishte final. Me këtë barazim Interi mbetet lider me 43 pikë, tri më shumë se Milani, kurse Napoli mbetet në kuotën e 39 pikëve, andaj gara për titull mbetet e hapur.